ಬೆಂಗಳೂರು ಸಾರ್ವಜನಿಕ ಸ್ಥಳಗಳ ಮರುವಿನ್ಯಾಸಕ್ಕೆ ನಾಗರಿಕರ ಐಡಿಯಾಗಳಿಗೆ ಆಹ್ವಾನ

ಬೆಂಗಳೂರು: ನಗರದ ಬೀದಿ ದೀಪಗಳು, ಬಸ್ ತಂಗುದಾಣಗಳು, ಸಾರ್ವಜನಿಕ ಬೆಂಚ್‌ಗಳು, ರಸ್ತೆ ವಿಭಾಜಕಗಳು, ಕಸದ ತೊಟ್ಟಿಗಳು, ನಾಮಫಲಕಗಳು, ಅಂಗಡಿ ಮುಂಗಟ್ಟುಗಳು ಹಾಗೂ ನೆರೆಹೊರೆಯ ಗುರುತುಗಳನ್ನು ಹೆಚ್ಚು ಉಪಯುಕ್ತ, ಸುರಕ್ಷಿತ ಮತ್ತು ಆಕರ್ಷಕವಾಗಿಸಲು ನಾಗರಿಕರಿಂದ ವಿನ್ಯಾಸ ಮತ್ತು ಆಲೋಚನೆಗಳನ್ನು ಆಹ್ವಾನಿಸಲಾಗಿದೆ.

ಬೃಹತ್ ಬೆಂಗಳೂರು ಪ್ರಾಧಿಕಾರದ ಆಶ್ರಯದಲ್ಲಿ ನಡೆಯಲಿರುವ ‘ಬೆಂಗಳೂರು ಜಾತ್ರೆ’ ಅಂಗವಾಗಿ ‘ಬೆಂಗಳೂರು ಡಿಸೈನ್: ಓಪನ್ ಕಾಲ್’ ಕಾರ್ಯಕ್ರಮವನ್ನು ಆಯೋಜಿಸಲಾಗಿದ್ದು, ವಿನ್ಯಾಸಕರು, ವಾಸ್ತುಶಿಲ್ಪಿಗಳು, ಕಲಾವಿದರು, ವಿದ್ಯಾರ್ಥಿಗಳು ಹಾಗೂ ಇತರ ಸೃಜನಶೀಲ ಚಿಂತಕರು ತಮ್ಮ ಪ್ರಾಯೋಗಿಕ ವಿನ್ಯಾಸಗಳನ್ನು ಸಲ್ಲಿಸಬಹುದಾಗಿದೆ.

ನಗರದ ಒಂದು 500 ಮೀಟರ್ ಉದ್ದದ ರಸ್ತೆ ಭಾಗವನ್ನು ಸಮಗ್ರವಾಗಿ ಮರುವಿನ್ಯಾಸಗೊಳಿಸುವ ಪ್ರಸ್ತಾಪಗಳನ್ನೂ ಸಾರ್ವಜನಿಕರು ಸಲ್ಲಿಸಬಹುದು. ಪಾದಚಾರಿ ಸಂಚಾರ, ರಸ್ತೆ ದಾಟುವಿಕೆ, ಹಸಿರು ಪ್ರದೇಶ, ಬೆಳಕು, ಸಾರ್ವಜನಿಕ ಸಾರಿಗೆ, ಸುರಕ್ಷತೆ ಹಾಗೂ ಸುತ್ತಮುತ್ತಲಿನ ಪರಿಸರವನ್ನು ಒಳಗೊಂಡ ಸಮಗ್ರ ವಿನ್ಯಾಸಗಳಿಗೆ ಅವಕಾಶ ಕಲ್ಪಿಸಲಾಗಿದೆ.

ಆಯ್ಕೆಯಾಗುವ ವಿನ್ಯಾಸಗಳನ್ನು ಡಿಸೆಂಬರ್ 4ರಿಂದ 13, 2026ರವರೆಗೆ ನಡೆಯಲಿರುವ ‘ಬೆಂಗಳೂರು ಜಾತ್ರೆ’ಯಲ್ಲಿ ಸಾರ್ವಜನಿಕ ಪ್ರದರ್ಶನಕ್ಕೆ ಇಡಲಾಗುವುದು. ಬೃಹತ್ ಬೆಂಗಳೂರು ಪ್ರಾಧಿಕಾರ ರಚಿಸುವ ತೀರ್ಪುಗಾರರ ಮಂಡಳಿ ಉತ್ತಮ ವಿನ್ಯಾಸಗಳನ್ನು ಆಯ್ಕೆ ಮಾಡಲಿದ್ದು, ತಾಂತ್ರಿಕ, ಹಣಕಾಸು ಹಾಗೂ ಕಾರ್ಯಾಚರಣಾ ಸಾಧ್ಯತೆಗಳನ್ನು ಪರಿಶೀಲಿಸಿದ ಬಳಿಕ ಅನುಷ್ಠಾನಕ್ಕೆ ಸಂಬಂಧಿಸಿದ ಮಹಾನಗರ ಪಾಲಿಕೆಗಳಿಗೆ ಶಿಫಾರಸು ಮಾಡಲಾಗುವುದು.

ಬೆಂಗಳೂರು ನಗರಾಭಿವೃದ್ಧಿ ಸಚಿವ ಕೃಷ್ಣ ಬೈರೇಗೌಡ ಮಾತನಾಡಿ, “ನಗರವನ್ನು ಕೇವಲ ದೊಡ್ಡ ಮೂಲಸೌಕರ್ಯ ಯೋಜನೆಗಳ ಮೂಲಕ ಮಾತ್ರ ಅನುಭವಿಸುವುದಿಲ್ಲ. ಜನರು ಪ್ರತಿದಿನ ಬಳಸುವ ಬೀದಿಗಳು, ಬಸ್ ತಂಗುದಾಣಗಳು, ಸಾರ್ವಜನಿಕ ಸ್ಥಳಗಳು ಮತ್ತು ಇತರ ಸೌಲಭ್ಯಗಳು ನಗರದ ಜೀವನಮಟ್ಟವನ್ನು ನಿರ್ಧರಿಸುತ್ತವೆ. ಬೆಂಗಳೂರನ್ನು ಹೆಚ್ಚು ಸುಲಭವಾಗಿ ಬಳಸಬಹುದಾದ, ಆಕರ್ಷಕ ಮತ್ತು ವಾಸಯೋಗ್ಯ ನಗರವನ್ನಾಗಿಸುವ ಆಲೋಚನೆಗಳನ್ನು ನಾಗರಿಕರಿಂದ ನಿರೀಕ್ಷಿಸುತ್ತಿದ್ದೇವೆ,” ಎಂದರು.

ಮಳೆಯಿಂದ ರಕ್ಷಣೆ ನೀಡುವ ಉತ್ತಮ ಬಸ್ ತಂಗುದಾಣ, ರಾತ್ರಿ ಸುರಕ್ಷಿತ ಸಂಚಾರಕ್ಕೆ ಸೂಕ್ತ ಬೀದಿ ದೀಪ, ಹಿರಿಯ ನಾಗರಿಕರಿಗೆ ವಿಶ್ರಾಂತಿ ನೀಡುವ ಬೆಂಚ್ ಅಥವಾ ಅಪರಿಚಿತ ಪ್ರದೇಶದಲ್ಲಿ ಸುಲಭವಾಗಿ ದಾರಿ ತೋರಿಸುವ ಸೂಚನಾ ಫಲಕ—ಇಂತಹ ಸಣ್ಣದಾಗಿ ಕಾಣುವ ಅಂಶಗಳೇ ನಗರ ಜೀವನದ ಗುಣಮಟ್ಟದಲ್ಲಿ ದೊಡ್ಡ ಬದಲಾವಣೆಯನ್ನು ತರಬಲ್ಲವು ಎಂಬುದು ಯೋಜನೆಯ ಆಶಯವಾಗಿದೆ.

ಪ್ರಾಯೋಗಿಕ ವಿನ್ಯಾಸಗಳಿಗೆ ಆದ್ಯತೆ

‘ಬೆಂಗಳೂರು ಡಿಸೈನ್: ಓಪನ್ ಕಾಲ್’ ಕೇವಲ ಆಕರ್ಷಕ ಚಿತ್ರಗಳು ಅಥವಾ ಬೃಹತ್ ಪರಿಕಲ್ಪನೆಗಳಿಗೆ ಸೀಮಿತವಾಗಿಲ್ಲ. ಕಡಿಮೆ ವೆಚ್ಚದಲ್ಲಿ ಅನುಷ್ಠಾನಗೊಳಿಸಬಹುದಾದ, ನಿರ್ವಹಣೆಗೆ ಸರಳವಾದ ಮತ್ತು ಸಾರ್ವಜನಿಕರ ದೈನಂದಿನ ಬಳಕೆಗೆ ಅನುಕೂಲವಾಗುವ ವಿನ್ಯಾಸಗಳಿಗೆ ಹೆಚ್ಚಿನ ಆದ್ಯತೆ ನೀಡಲಾಗುತ್ತದೆ.

ಈ ಕುರಿತು ಕೃಷ್ಣ ಬೈರೇಗೌಡ, “ಉತ್ತಮ ವಿನ್ಯಾಸ ಕೇವಲ ನೋಡಲು ಸುಂದರವಾಗಿದ್ದರೆ ಸಾಲದು. ಅದು ನೈಜ ಪರಿಸ್ಥಿತಿಯಲ್ಲಿ ಕಾರ್ಯನಿರ್ವಹಿಸಬೇಕು, ನಿರ್ವಹಣೆಗೆ ಕೈಗೆಟುಕುವಂತಿರಬೇಕು ಮತ್ತು ನಾಗರಿಕರ ದೈನಂದಿನ ಅನುಭವವನ್ನು ಸುಧಾರಿಸಬೇಕು,” ಎಂದು ಹೇಳಿದರು.

ಯಾವ ಕ್ಷೇತ್ರಗಳಲ್ಲಿ ವಿನ್ಯಾಸ ಸಲ್ಲಿಸಬಹುದು?

ಬೀದಿ ದೀಪಗಳ ವಿನ್ಯಾಸ ಮತ್ತು ಅಳವಡಿಕೆ, ಮಳೆ-ಬಿಸಿಲಿನಿಂದ ರಕ್ಷಣೆ ನೀಡುವ ಹಾಗೂ ವಿಕಲಚೇತನ ಸ್ನೇಹಿ ಬಸ್ ತಂಗುದಾಣಗಳು, ಸಾರ್ವಜನಿಕ ಬೆಂಚ್‌ಗಳು, ಹಸಿರು ರಸ್ತೆ ವಿಭಾಜಕಗಳು, ಸುಲಭ ನಿರ್ವಹಣೆಯ ಕಸದ ತೊಟ್ಟಿಗಳು, ಸ್ಪಷ್ಟ ನಾಮಫಲಕಗಳು ಮತ್ತು ನಾಗರಿಕ ಸೂಚನಾ ವ್ಯವಸ್ಥೆಗಳು, ಆಕರ್ಷಕ ಅಂಗಡಿ ಮುಂಗಟ್ಟುಗಳು ಹಾಗೂ ಪ್ರತಿಯೊಂದು ಪ್ರದೇಶದ ಇತಿಹಾಸ ಮತ್ತು ಸಂಸ್ಕೃತಿಯನ್ನು ಪ್ರತಿಬಿಂಬಿಸುವ ನೆರೆಹೊರೆಯ ದೃಶ್ಯ ಗುರುತುಗಳಿಗೆ ಸಂಬಂಧಿಸಿದ ಪ್ರಸ್ತಾಪಗಳನ್ನು ಸಲ್ಲಿಸಬಹುದು.

ಐದು ಮಹಾನಗರ ಪಾಲಿಕೆಗಳಿಗೆ ಪ್ರತ್ಯೇಕ ಗುರುತು

ಬೃಹತ್ ಬೆಂಗಳೂರು ಪ್ರಾಧಿಕಾರದ ವ್ಯಾಪ್ತಿಯ ಐದು ಮಹಾನಗರ ಪಾಲಿಕೆಗಳು ತಮ್ಮದೇ ಆದ ಸ್ಥಳೀಯ ಸಂಸ್ಕೃತಿ ಮತ್ತು ವೈಶಿಷ್ಟ್ಯವನ್ನು ಪ್ರತಿಬಿಂಬಿಸುವ ದೃಶ್ಯ ಗುರುತನ್ನು ಹೊಂದುವ ಸಾಧ್ಯತೆಗಳನ್ನೂ ಈ ವಿನ್ಯಾಸ ಸವಾಲಿನ ಮೂಲಕ ಅನ್ವೇಷಿಸಲಾಗುತ್ತಿದೆ.

ಪ್ರತಿಯೊಂದು ಪ್ರದೇಶವೂ ತನ್ನದೇ ಗುರುತನ್ನು ಉಳಿಸಿಕೊಂಡು, ಬೆಂಗಳೂರಿನ ಒಟ್ಟಾರೆ ನಗರ ವಿನ್ಯಾಸದೊಂದಿಗೆ ಸಂಪರ್ಕ ಹೊಂದುವಂತೆ ಪರಿಹಾರಗಳನ್ನು ರೂಪಿಸುವುದು ಇದರ ಉದ್ದೇಶವಾಗಿದೆ.

ಯುವಜನತೆ ಮತ್ತು ವಿದ್ಯಾರ್ಥಿಗಳು ತಮ್ಮ ನಗರಕ್ಕೆ ನೇರವಾಗಿ ಉಪಯೋಗವಾಗುವ ಆಲೋಚನೆಗಳನ್ನು ಪ್ರಸ್ತಾಪಿಸಲು ಈ ಕಾರ್ಯಕ್ರಮ ಉತ್ತಮ ವೇದಿಕೆಯಾಗಿದೆ. ಆಯ್ಕೆಯಾಗುವ ಅತ್ಯುತ್ತಮ ವಿನ್ಯಾಸಕರಿಗೆ ತಮ್ಮ ಪರಿಕಲ್ಪನೆಗಳನ್ನು ವಿವರಿಸಲು ಹಾಗೂ ಮುಂದಿನ ಅನುಷ್ಠಾನ ಕ್ರಮಗಳ ಕುರಿತು ಚರ್ಚಿಸಲು ಬೆಂಗಳೂರು ನಗರಾಭಿವೃದ್ಧಿ ಸಚಿವರನ್ನು ಭೇಟಿ ಮಾಡುವ ಅವಕಾಶವೂ ದೊರೆಯಲಿದೆ.

ವಿನ್ಯಾಸ ಸಲ್ಲಿಕೆಯ ವಿವರಗಳು

ಕೊನೆಯ ದಿನಾಂಕ: ನವೆಂಬರ್ 15, 2026

ಇಮೇಲ್: support@bengalurujatre.in

ಆಯ್ಕೆಯಾದ ವಿನ್ಯಾಸಗಳ ಪ್ರದರ್ಶನ: ಡಿಸೆಂಬರ್ 4ರಿಂದ 13, 2026

ಕಾರ್ಯಕ್ರಮ: ಬೆಂಗಳೂರು ಜಾತ್ರೆ