ಜೀವ ಉಳಿಸುವ ಮೊದಲ 60 ನಿಮಿಷಗಳಿಗೆ ಮ್ಯಾಗ್ನೆಟ್ ಹಾಸ್ಪಿಟಲ್ಸ್‌ನ ‘ಗೋಲ್ಡನ್ ಅವರ್ ರೆಕಗ್ನಿಷನ್’ ಗೌರವ
ತುರ್ತು ಚಿಕಿತ್ಸಾ ದಾದಿಯರ ಸೇವೆಗೆ ವಿಶೇಷ ಮನ್ನಣೆ; ಬೆಂಗಳೂರು ಪ್ರೆಸ್ ಕ್ಲಬ್‌ನಲ್ಲಿ ಅಭಿಯಾನಕ್ಕೆ ಚಾಲನೆ | ಅಪಘಾತ ಅಥವಾ ತುರ್ತು ಪರಿಸ್ಥಿತಿಯ ನಂತರದ ಮೊದಲ 60 ನಿಮಿಷಗಳು ರೋಗಿಯ ಜೀವ ಉಳಿಸುವಲ್ಲಿ ಅತ್ಯಂತ ಮಹತ್ವದ್ದಾಗಿವೆ. ಈ ‘ಗೋಲ್ಡನ್ ಅವರ್’ ಪರಿಕಲ್ಪನೆಯ ಮಹತ್ವವನ್ನು ಸಾರಲು ಮತ್ತು ತುರ್ತು ಚಿಕಿತ್ಸೆಯಲ್ಲಿ ನಿರಂತರ ಸೇವೆ ಸಲ್ಲಿಸುತ್ತಿರುವ ದಾದಿಯರನ್ನು ಗೌರವಿಸಲು ಮ್ಯಾಗ್ನೆಟ್ ಹಾಸ್ಪಿಟಲ್ಸ್ ‘ಗೋಲ್ಡನ್ ಅವರ್ ರೆಕಗ್ನಿಷನ್’ ಅಭಿಯಾನಕ್ಕೆ ಚಾಲನೆ ನೀಡಿತು.
ಬೆಂಗಳೂರು: ಅಪಘಾತ ಅಥವಾ ತುರ್ತು ವೈದ್ಯಕೀಯ ಪರಿಸ್ಥಿತಿಯ ನಂತರದ ಮೊದಲ 60 ನಿಮಿಷಗಳು ರೋಗಿಯ ಜೀವ ಉಳಿಸುವಲ್ಲಿ ಅತ್ಯಂತ ನಿರ್ಣಾಯಕವಾಗಿದ್ದು, ಈ ‘ಗೋಲ್ಡನ್ ಅವರ್’ ಮಹತ್ವವನ್ನು ಸಾರಲು ಹಾಗೂ ತುರ್ತು ಚಿಕಿತ್ಸಾ ದಾದಿಯರ ಸೇವೆಯನ್ನು ಗುರುತಿಸಲು ಮ್ಯಾಗ್ನೆಟ್ ಹಾಸ್ಪಿಟಲ್ಸ್ ವತಿಯಿಂದ ‘ಗೋಲ್ಡನ್ ಅವರ್ ರೆಕಗ್ನಿಷನ್’ (ಸುವರ್ಣ ಘಂಟೆಯ ಗೌರವ) ಅಭಿಯಾನಕ್ಕೆ ಬೆಂಗಳೂರಿನ ಪ್ರೆಸ್ ಕ್ಲಬ್‌ನಲ್ಲಿ ಚಾಲನೆ ನೀಡಲಾಯಿತು.
ವೈದ್ಯರ ಒಡೆತನ ಮತ್ತು ವೈದ್ಯರಿಂದಲೇ ನಿರ್ವಹಿಸಲ್ಪಡುವ ಆಸ್ಪತ್ರೆಗಳ ಜಾಲವಾದ ಮ್ಯಾಗ್ನೆಟ್ ಹಾಸ್ಪಿಟಲ್ಸ್ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ವೈದ್ಯರು, ದಾದಿಯರು ಮತ್ತು ರೋಗಿಗಳ ಅನುಭವಗಳನ್ನು ಹಂಚಿಕೊಳ್ಳಲಾಯಿತು.
ಕಾರ್ಯಕ್ರಮದಲ್ಲಿ ಮಾತನಾಡಿದ ಡಾ. ರಮೇಶ್, ಅಪಘಾತದ ನಂತರದ ಮೊದಲ 60 ನಿಮಿಷಗಳನ್ನು ವೈದ್ಯಕೀಯ ಕ್ಷೇತ್ರದಲ್ಲಿ ‘ಗೋಲ್ಡನ್ ಅವರ್’ ಎಂದು ಕರೆಯಲಾಗುತ್ತದೆ. “ಈ ಅವಧಿಯಲ್ಲಿ ರೋಗಿಯನ್ನು ತುರ್ತು ಚಿಕಿತ್ಸಾ ವಿಭಾಗಕ್ಕೆ ತಲುಪಿಸಿದರೆ ಜೀವ ಉಳಿಸುವ ಸಾಧ್ಯತೆಗಳು ಹೆಚ್ಚಾಗುತ್ತವೆ. ಪ್ರತಿಯೊಂದು ನಿಮಿಷವೂ ಇಲ್ಲಿ ಮುಖ್ಯವಾಗಿರುತ್ತದೆ,” ಎಂದು ಹೇಳಿದರು.
ತುರ್ತು ಚಿಕಿತ್ಸೆ ಕೇವಲ ವೈದ್ಯರ ಜವಾಬ್ದಾರಿ ಅಲ್ಲ, ಅದು ಸಾರ್ವಜನಿಕರು, ಆಂಬ್ಯುಲೆನ್ಸ್ ಸಿಬ್ಬಂದಿ, ವೈದ್ಯರು ಮತ್ತು ದಾದಿಯರ ಒಟ್ಟಾರೆ ತಂಡದ ಕಾರ್ಯವಾಗಿದೆ ಎಂದು ಅವರು ಹೇಳಿದರು. ಅಪಘಾತ ಸಂಭವಿಸಿದಾಗ ಸಹಾಯ ಮಾಡುವ ಮನೋಭಾವ ಬೆಳೆಸಿಕೊಳ್ಳಬೇಕು ಎಂದು ಕರೆ ನೀಡಿದರು.
ಹಿರಿಯ ನರಶಸ್ತ್ರಚಿಕಿತ್ಸಕ ಡಾ. ವೆಂಕಟರಮಣ ಮಾತನಾಡಿ, ಕಳೆದ 25 ವರ್ಷಗಳಿಂದ ‘ಗೋಲ್ಡನ್ ಅವರ್’ ಪರಿಕಲ್ಪನೆ ತಮ್ಮ ಹೃದಯಕ್ಕೆ ಹತ್ತಿರವಾಗಿದೆ ಎಂದರು.
“ಅಪಘಾತ, ಹೃದಯಾಘಾತ, ಪಾರ್ಶ್ವವಾಯು ಅಥವಾ ತಲೆಗೆ ಗಾಯವಾದ ನಂತರ ಕೆಲವೇ ನಿಮಿಷಗಳಲ್ಲಿ ದೇಹದಲ್ಲಿ ದ್ವಿತೀಯ ಸಮಸ್ಯೆಗಳು ಆರಂಭವಾಗಬಹುದು. ಆಮ್ಲಜನಕ ಅಥವಾ ರಕ್ತ ಪೂರೈಕೆ ಕಡಿಮೆಯಾದರೆ ಮೂರುರಿಂದ ಐದು ನಿಮಿಷಗಳಲ್ಲೇ ಮೆದುಳಿಗೆ ಶಾಶ್ವತ ಹಾನಿಯಾಗುವ ಸಾಧ್ಯತೆ ಇರುತ್ತದೆ,” ಎಂದು ವಿವರಿಸಿದರು.
ಗೋಲ್ಡನ್ ಅವರ್‌ನಲ್ಲಿ ಸರಿಯಾದ ಚಿಕಿತ್ಸೆ ನೀಡುವುದರಿಂದ ಮರಣ ಪ್ರಮಾಣ, ತೊಂದರೆಗಳು, ಆಸ್ಪತ್ರೆಯಲ್ಲಿನ ಉಳಿಕೆಯ ಅವಧಿ ಮತ್ತು ಚಿಕಿತ್ಸಾ ವೆಚ್ಚ ಕಡಿಮೆಯಾಗುತ್ತದೆ. ರೋಗಿಯ ಜೀವನದ ಗುಣಮಟ್ಟವೂ ಉತ್ತಮವಾಗುತ್ತದೆ ಎಂದು ಅವರು ಹೇಳಿದರು.
ತುರ್ತು ಚಿಕಿತ್ಸೆಯಲ್ಲಿ ದಾದಿಯರ ಪಾತ್ರವನ್ನು ಶ್ಲಾಘಿಸಿದ ಡಾ. ವೆಂಕಟರಮಣ, “ತುರ್ತು ಪರಿಸ್ಥಿತಿಯಲ್ಲಿ ಪ್ರತಿ ಕ್ಷಣವೂ ನಿರ್ಣಾಯಕ. ರೋಗಿಯ ಮೌಲ್ಯಮಾಪನ, ಚಿಕಿತ್ಸೆ ವ್ಯವಸ್ಥೆ, ವೈದ್ಯರೊಂದಿಗೆ ಸಮನ್ವಯ ಸೇರಿದಂತೆ ಹಲವು ಪ್ರಮುಖ ಕಾರ್ಯಗಳನ್ನು ದಾದಿಯರು ನಿರ್ವಹಿಸುತ್ತಾರೆ,” ಎಂದರು.
ಖ್ಯಾತ ಸಂತಾನೋತ್ಪತ್ತಿ ತಜ್ಞೆ ಡಾ. ಕಾಮಿನಿ ರಾವ್ ಮಾತನಾಡಿ, ಆಸ್ಪತ್ರೆಯ ನಿಜವಾದ ಶಕ್ತಿ ದಾದಿಯರು ಎಂದು ಹೇಳಿದರು.
“ದಾದಿಯರು ಕೇವಲ ಆರೈಕೆ ಮಾಡುವವರಲ್ಲ. ಅವರು ರೋಗಿಗಳಿಗೆ ಧೈರ್ಯ, ಸಹಾನುಭೂತಿ ಮತ್ತು ಆತ್ಮೀಯತೆ ನೀಡುತ್ತಾರೆ. ವೈದ್ಯಕೀಯ ಸೇವೆಯಲ್ಲಿ ಅವರ ಪಾತ್ರವನ್ನು ಇನ್ನಷ್ಟು ಗುರುತಿಸಬೇಕಾಗಿದೆ,” ಎಂದರು.
ತುರ್ತು ಚಿಕಿತ್ಸಾ ದಾದಿಯರು ಒತ್ತಡದ ಸಂದರ್ಭದಲ್ಲಿಯೂ ತ್ವರಿತ ನಿರ್ಧಾರ ತೆಗೆದುಕೊಳ್ಳುವ ಸಾಮರ್ಥ್ಯ ಹೊಂದಿದ್ದಾರೆ. ಗೋಲ್ಡನ್ ಅವರ್‌ನಲ್ಲಿ ಅವರು ಕೈಗೊಳ್ಳುವ ಕ್ರಮಗಳು ರೋಗಿಯ ಚೇತರಿಕೆಗೆ ಪ್ರಮುಖ ಕಾರಣವಾಗುತ್ತವೆ ಎಂದು ಅವರು ಹೇಳಿದರು.
ಕಾರ್ಯಕ್ರಮದಲ್ಲಿ ಮ್ಯಾಗ್ನೆಟ್ ಹಾಸ್ಪಿಟಲ್ಸ್‌ನ ಎಲೆಕ್ಟ್ರಾನಿಕ್ ಸಿಟಿ, ಬನ್ನೇರುಘಟ್ಟ ರಸ್ತೆ, ಜಿಗಣಿ, ಜಯನಗರ ಸೇರಿದಂತೆ ವಿವಿಧ ಆಸ್ಪತ್ರೆಗಳ ತುರ್ತು ಚಿಕಿತ್ಸಾ ವಿಭಾಗದ ದಾದಿಯರನ್ನು ಗೌರವಿಸಲಾಯಿತು.
ಮ್ಯಾಗ್ನೆಟ್ ಹಾಸ್ಪಿಟಲ್ಸ್‌ನ ವ್ಯವಸ್ಥಾಪಕ ನಿರ್ದೇಶಕ ದಿನೇಶ್ ಮಾಧವನ್ ಮಾತನಾಡಿ, “ಗೋಲ್ಡನ್ ಅವರ್ ರೆಕಗ್ನಿಷನ್ ಅಭಿಯಾನವು ತುರ್ತು ಚಿಕಿತ್ಸಾ ದಾದಿಯರಿಗೆ ಅವರು ಅರ್ಹರಾಗಿರುವ ಗೌರವ ನೀಡುವ ಪ್ರಯತ್ನವಾಗಿದೆ. ದಾದಿಯರು ಕೇವಲ ಆರೈಕೆ ಮಾಡುವವರಲ್ಲ; ಅವರು ಚಿಕಿತ್ಸಾ ಪ್ರಕ್ರಿಯೆಯ ಪ್ರಮುಖ ಭಾಗವಾಗಿದ್ದಾರೆ,” ಎಂದು ಹೇಳಿದರು.
ಕಾರ್ಯಕ್ರಮದಲ್ಲಿ ಹಲವು ದಾದಿಯರು ತಮ್ಮ ಅನುಭವಗಳನ್ನು ಹಂಚಿಕೊಂಡರು. ಸಿಸ್ಟರ್ ಗ್ರೇಟಾ ಮಾತನಾಡಿ, ತುರ್ತು ಚಿಕಿತ್ಸೆಯಲ್ಲಿ ವೇಗ, ಆತ್ಮವಿಶ್ವಾಸ ಮತ್ತು ಸರಿಯಾದ ಸಂವಹನ ಅತ್ಯಂತ ಮುಖ್ಯ ಎಂದರು.
“ಎದೆನೋವಿನಿಂದ ಬಂದ ರೋಗಿಯೊಬ್ಬರನ್ನು ಸಮಯಕ್ಕೆ ಸರಿಯಾಗಿ ಚಿಕಿತ್ಸೆ ನೀಡಿ ಉಳಿಸಲು ಸಾಧ್ಯವಾಯಿತು. ಆದರೆ ಕೆಲವೊಮ್ಮೆ ತಡವಾಗಿ ಆಸ್ಪತ್ರೆಗೆ ಬಂದ ಕಾರಣ ರೋಗಿಗಳನ್ನು ಕಳೆದುಕೊಂಡ ಅನುಭವವೂ ಇದೆ. ಗೋಲ್ಡನ್ ಅವರ್ ಕಳೆದುಕೊಳ್ಳಬಾರದು,” ಎಂದು ಹೇಳಿದರು.
ತುರ್ತು ಚಿಕಿತ್ಸಾ ದಾದಿಯರ ಸೇವೆ ದಿನದ 24 ಗಂಟೆಯೂ ನಿರಂತರವಾಗಿದ್ದು, ಅವರ ಸೇವೆಗೆ ಪ್ರತಿದಿನವೂ ಗೌರವ ಸಲ್ಲಿಸಬೇಕು ಎಂದು ಕಾರ್ಯಕ್ರಮದಲ್ಲಿ ಅಭಿಪ್ರಾಯ ವ್ಯಕ್ತವಾಯಿತು.
ಮ್ಯಾಗ್ನೆಟ್ ಹಾಸ್ಪಿಟಲ್ಸ್‌ನ ಈ ಅಭಿಯಾನವು ತುರ್ತು ಚಿಕಿತ್ಸೆಯ ಮಹತ್ವದ ಬಗ್ಗೆ ಸಾರ್ವಜನಿಕರಲ್ಲಿ ಅರಿವು ಮೂಡಿಸುವುದರ ಜೊತೆಗೆ, ಜೀವ ಉಳಿಸುವಲ್ಲಿ ಪ್ರಮುಖ ಪಾತ್ರ ವಹಿಸುವ ದಾದಿಯರ ಸೇವೆಯನ್ನು ಗುರುತಿಸುವ ಉದ್ದೇಶ ಹೊಂದಿದೆ.