ಶಿಶುಗಳ ರಕ್ಷಣೆಗೆ ಹೊಸ ಆರ್‌ಎಸ್‌ವಿ ಲಸಿಕೆ
ಜಿನೀವಾ: ಉಸಿರಾಟದ ತೊಂದರೆ ಮತ್ತು ನ್ಯುಮೋನಿಯಾಗೆ ಕಾರಣವಾಗುವ ಆರ್‌ಎಸ್‌ವಿ (Respiratory Syncytial Virus) ಸೋಂಕಿನಿಂದ ಶಿಶುಗಳನ್ನು ರಕ್ಷಿಸಲು ವಿಶ್ವ ಆರೋಗ್ಯ ಸಂಸ್ಥೆ (WHO) ಮಹತ್ವದ ಹೆಜ್ಜೆ ಇಟ್ಟಿದೆ. ಗರ್ಭಿಣಿಯರಿಗೆ ನೀಡುವ ಆರ್‌ಎಸ್‌ವಿ ಲಸಿಕೆಯ ಬಹು-ಡೋಸ್ ಬಾಟಲಿಗೆ WHO ಪೂರ್ವ ಅರ್ಹತೆ ನೀಡಿದೆ.
ಈ ಹೊಸ ಬಹು-ಡೋಸ್ ಲಸಿಕೆ ಕಡಿಮೆ ವೆಚ್ಚದಲ್ಲಿ ಹೆಚ್ಚಿನ ಸಂಖ್ಯೆಯ ಗರ್ಭಿಣಿಯರಿಗೆ ಲಸಿಕೆ ನೀಡಲು ನೆರವಾಗಲಿದೆ. ವಿಶೇಷವಾಗಿ ಕಡಿಮೆ ಮತ್ತು ಮಧ್ಯಮ ಆದಾಯದ ದೇಶಗಳಲ್ಲಿ ಲಸಿಕೆ ಕಾರ್ಯಕ್ರಮಗಳನ್ನು ದೊಡ್ಡ ಪ್ರಮಾಣದಲ್ಲಿ ಜಾರಿಗೆ ತರಲು ಇದು ಸಹಕಾರಿಯಾಗಲಿದೆ.
ಆರ್‌ಎಸ್‌ವಿ ಸೋಂಕಿನಿಂದ ಪ್ರತಿ ವರ್ಷ ಐದು ವರ್ಷದೊಳಗಿನ ಮಕ್ಕಳಲ್ಲಿ ಸುಮಾರು 36 ಲಕ್ಷ ಮಂದಿ ಆಸ್ಪತ್ರೆಗೆ ದಾಖಲಾಗುತ್ತಾರೆ. ಸುಮಾರು 1 ಲಕ್ಷ ಮಕ್ಕಳು ಸಾವನ್ನಪ್ಪುತ್ತಾರೆ. ಈ ಪೈಕಿ ಅರ್ಧದಷ್ಟು ಸಾವುಗಳು ಆರು ತಿಂಗಳೊಳಗಿನ ಶಿಶುಗಳಲ್ಲಿ ಸಂಭವಿಸುತ್ತವೆ.
ಗರ್ಭಾವಸ್ಥೆಯ ಮೂರನೇ ತ್ರೈಮಾಸಿಕದಲ್ಲಿ, ಅಂದರೆ 28ನೇ ವಾರದಿಂದ ಗರ್ಭಿಣಿಯರಿಗೆ ಈ ಲಸಿಕೆ ನೀಡಲು WHO ಶಿಫಾರಸು ಮಾಡಿದೆ. ಲಸಿಕೆ ಪಡೆದ ತಾಯಿಯಿಂದ ಮಗುವಿಗೆ ಪ್ರತಿಕಾಯಗಳು ವರ್ಗಾವಣೆಯಾಗುತ್ತವೆ. ಇದರಿಂದ ಜನನದ ನಂತರದ ಮೊದಲ ಆರು ತಿಂಗಳಲ್ಲಿ ಶಿಶುವಿಗೆ ಆರ್‌ಎಸ್‌ವಿ ಸೋಂಕಿನಿಂದ ರಕ್ಷಣೆ ದೊರೆಯುತ್ತದೆ.
ವಿಶ್ವದಾದ್ಯಂತ ಶಿಶುಗಳಲ್ಲಿ ಆರ್‌ಎಸ್‌ವಿ ಸೋಂಕಿನ ಗಂಭೀರ ಪರಿಣಾಮಗಳನ್ನು ಕಡಿಮೆ ಮಾಡಲು ದೇಶಗಳು ಗರ್ಭಿಣಿಯರಿಗೆ ಆರ್‌ಎಸ್‌ವಿ ಲಸಿಕೆ ಅಥವಾ ಶಿಶುಗಳಿಗೆ ನೀಡುವ ‘ನಿರ್ಸೆವಿಮ್ಯಾಬ್’ ಔಷಧವನ್ನು ರಾಷ್ಟ್ರೀಯ ಲಸಿಕಾ ಕಾರ್ಯಕ್ರಮದಲ್ಲಿ ಸೇರಿಸಿಕೊಳ್ಳುವಂತೆ WHO ಶಿಫಾರಸು ಮಾಡಿದೆ.