8,000 ಕರ್ನಾಟಕ ಫಿಲಾಟಲಿ ಪಾಸ್‌ಪೋರ್ಟ್ ಮಾರಾಟಕ್ಕೆ ಅಂಚೆ ಇಲಾಖೆ ಸಜ್ಜು

ಬೆಂಗಳೂರು: ಕರ್ನಾಟಕದ ಪರಂಪರೆ, ಪ್ರವಾಸೋದ್ಯಮ ಹಾಗೂ ಅಂಚೆಚೀಟಿ ಸಂಗ್ರಹಣೆಯನ್ನು ಒಂದೇ ವೇದಿಕೆಯಲ್ಲಿ ಪರಿಚಯಿಸುವ ವಿಶಿಷ್ಟ ‘ಕರ್ನಾಟಕ ಫಿಲಾಟಲಿ ಪಾಸ್‌ಪೋರ್ಟ್’ ನೇರ ಮಾರಾಟವನ್ನು ಭಾರತೀಯ ಅಂಚೆ ಇಲಾಖೆಯ ಕರ್ನಾಟಕ ಅಂಚೆ ವೃತ್ತವು ಅಕ್ಟೋಬರ್ 10 ಮತ್ತು 11ರಂದು ಆಯೋಜಿಸಿದೆ ಎಂದು ಕರ್ನಾಟಕ ಅಂಚೆ ವೃತ್ತದ ಮುಖ್ಯ ಪೋಸ್ಟ್ ಮಾಸ್ಟರ್ ಜನರಲ್ ಸ್ವಾತಿ ಪಾಂಡೆ ತಿಳಿಸಿದರು.

ಬೆಂಗಳೂರಿನ ಪ್ರೆಸ್ ಕ್ಲಬ್‌ನಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ರಾಜ್ಯಾದ್ಯಂತ ಪರಂಪರೆ ಪ್ರಿಯರು, ಪ್ರವಾಸಿಗರು ಹಾಗೂ ಫಿಲಾಟಲಿ ಆಸಕ್ತರಿಂದ ದೊರೆತ ಅಭೂತಪೂರ್ವ ಪ್ರತಿಕ್ರಿಯೆಯ ಹಿನ್ನೆಲೆಯಲ್ಲಿ ಈ ಬಾರಿ ಒಟ್ಟು 8,000 ಫಿಲಾಟಲಿ ಪಾಸ್‌ಪೋರ್ಟ್‌ಗಳನ್ನು ಮಾರಾಟಕ್ಕೆ ಇಡಲಾಗುತ್ತಿದೆ. ಪ್ರತಿ ಪಾಸ್‌ಪೋರ್ಟ್‌ಗೆ ₹600 ದರ ನಿಗದಿಪಡಿಸಲಾಗಿದ್ದು, ಬೆಂಗಳೂರು, ಮೈಸೂರು, ಮಂಗಳೂರು ಮತ್ತು ಬೆಳಗಾವಿಯ ಆಯ್ದ ಅಂಚೆ ಕಚೇರಿಗಳಲ್ಲಿ ನೇರವಾಗಿ ಖರೀದಿಸಬಹುದಾಗಿದೆ ಎಂದು ಹೇಳಿದರು.

ಕರ್ನಾಟಕ ಫಿಲಾಟಲಿ ಪಾಸ್‌ಪೋರ್ಟ್ ಅನ್ನು ಕೇವಲ ಅಂಚೆಚೀಟಿ ಸಂಗ್ರಹಣೆಯ ವಸ್ತುವಾಗಿ ಮಾತ್ರವಲ್ಲದೆ, ರಾಜ್ಯದ ಪಾರಂಪರಿಕ ತಾಣಗಳನ್ನು ಪರಿಚಯಿಸುವ ಪ್ರವಾಸ ದಿನಚರಿ ಮತ್ತು ಜೀವನಪರ್ಯಂತ ಉಳಿಸಿಕೊಳ್ಳಬಹುದಾದ ಸ್ಮರಣಿಕೆಯಾಗಿ ರೂಪಿಸಲಾಗಿದೆ. ಪಾಸ್‌ಪೋರ್ಟ್ ಹೊಂದಿರುವವರು ಕರ್ನಾಟಕದ ಪ್ರಮುಖ ಪಾರಂಪರಿಕ ತಾಣಗಳಿಗೆ ಭೇಟಿ ನೀಡಿ, ಅಲ್ಲಿನ ಅಂಚೆಚೀಟಿಗಳನ್ನು ಖರೀದಿಸಿ, ನಿಗದಿತ ಅಂಚೆ ಕಚೇರಿಗಳಲ್ಲಿ ವಿಶಿಷ್ಟ ಶಾಶ್ವತ ಚಿತ್ರಾತ್ಮಕ ಅಂಚೆ ಮೊಹರುಗಳನ್ನು (Permanent Pictorial Cancellations-PPC) ಸಂಗ್ರಹಿಸಬಹುದು ಎಂದು ಸ್ವಾತಿ ಪಾಂಡೆ ವಿವರಿಸಿದರು.

ಕರ್ನಾಟಕದ ಇತಿಹಾಸ, ಕಲೆ, ಸಂಸ್ಕೃತಿ, ವಾಸ್ತುಶಿಲ್ಪ, ಸಸ್ಯ-ಪ್ರಾಣಿ ಸಂಪತ್ತು, ಕರಕುಶಲ ಕಲೆ, ವಸ್ತ್ರ ಪರಂಪರೆ ಸೇರಿದಂತೆ ರಾಜ್ಯದ ವೈವಿಧ್ಯಮಯ ಸಾಂಸ್ಕೃತಿಕ ಸಂಪತ್ತನ್ನು ಹೊಸ ತಲೆಮಾರಿಗೆ ಪರಿಚಯಿಸುವುದು ಈ ಯೋಜನೆಯ ಪ್ರಮುಖ ಉದ್ದೇಶವಾಗಿದೆ. ಸುಮಾರು 100 ತಾಣಗಳನ್ನು ಒಳಗೊಂಡಿರುವ ಈ ಪಾಸ್‌ಪೋರ್ಟ್ ಮೂಲಕ ಜನರು ತಮ್ಮದೇ ರಾಜ್ಯವನ್ನು ಹೊಸ ದೃಷ್ಟಿಕೋನದಿಂದ ಅನ್ವೇಷಿಸುವ ಅವಕಾಶ ಪಡೆಯಲಿದ್ದಾರೆ ಎಂದರು.

ಡಿಜಿಟಲ್ ಡಿಟಾಕ್ಸ್, ಪತ್ರ ಬರವಣಿಗೆಗೆ ಉತ್ತೇಜನ

ಬೆಂಗಳೂರು ಜಿಪಿಒದಲ್ಲಿ ಈ ಕಾರ್ಯಕ್ರಮದ ಅಂಗವಾಗಿ ವಿಶೇಷ ‘ಡಿಜಿಟಲ್ ಡಿಟಾಕ್ಸ್ ಮತ್ತು ಪತ್ರ ಬರವಣಿಗೆ ವಲಯ’ ಸ್ಥಾಪಿಸಲಾಗುತ್ತದೆ. ಮೊಬೈಲ್ ಫೋನ್, ವಾಟ್ಸಾಪ್, ಇ-ಮೇಲ್ ಸೇರಿದಂತೆ ಡಿಜಿಟಲ್ ಮಾಧ್ಯಮಗಳಿಂದ ಕೆಲಕಾಲ ದೂರವಿದ್ದು, ಆತ್ಮೀಯರಿಗೆ ಕೈಬರಹದ ಪತ್ರ ಬರೆಯುವ ಹಳೆಯ ಸಂಭ್ರಮವನ್ನು ಮತ್ತೆ ಅನುಭವಿಸುವಂತೆ ಸಾರ್ವಜನಿಕರನ್ನು ಪ್ರೋತ್ಸಾಹಿಸಲಾಗುತ್ತದೆ ಎಂದು ಅವರು ತಿಳಿಸಿದರು.

ಪತ್ರ ಬರೆಯಲು ಬಯಸುವವರಿಗೆ ಉಚಿತ ಚಿತ್ರ ಅಂಚೆ ಕಾರ್ಡ್‌ಗಳು ಹಾಗೂ ಅಗತ್ಯ ಬರವಣಿಗೆ ಸಾಮಗ್ರಿಗಳನ್ನು ಒದಗಿಸಲಾಗುತ್ತದೆ. ಚನ್ನಪಟ್ಟಣದ ಸಾಂಪ್ರದಾಯಿಕ ಗೊಂಬೆಗಳ ಪರಿಕಲ್ಪನೆಯನ್ನು ಆಧರಿಸಿ ರೂಪಿಸಿರುವ ವಿಶೇಷ ಪೋಸ್ಟ್‌ಕಾರ್ಡ್‌ಗಳು AR ತಂತ್ರಜ್ಞಾನ ಹೊಂದಿದ್ದು, ಅವುಗಳನ್ನು ಸ್ಕ್ಯಾನ್ ಮಾಡಿದಾಗ ಚನ್ನಪಟ್ಟಣದ ಗೊಂಬೆಗಳ ಇತಿಹಾಸ ಹಾಗೂ ಕರಕುಶಲ ಪರಂಪರೆಯ ಮಾಹಿತಿಯನ್ನು ತಿಳಿದುಕೊಳ್ಳಬಹುದಾಗಿದೆ ಎಂದರು.

ಪಾಸ್‌ಪೋರ್ಟ್ ಜೊತೆಗೆ ಉಚಿತ ಉಡುಗೊರೆ

ಪ್ರತಿ ಫಿಲಾಟಲಿ ಪಾಸ್‌ಪೋರ್ಟ್ ಖರೀದಿಯೊಂದಿಗೆ ಅಂಚೆಪೆಟ್ಟಿಗೆ ವಿನ್ಯಾಸದ ಬುಕ್‌ಮಾರ್ಕ್ ಹಾಗೂ ವಿಶೇಷವಾಗಿ ವಿನ್ಯಾಸಗೊಳಿಸಿದ ಕಾಗದದ ಚೀಲವನ್ನು ಉಚಿತವಾಗಿ ನೀಡಲಾಗುತ್ತದೆ. ಇದರ ಜೊತೆಗೆ ಚನ್ನಪಟ್ಟಣದ ಗೊಂಬೆ ಶೈಲಿಯ ಪೆನ್‌ಸ್ಟ್ಯಾಂಡ್‌ಗಳು, ಅಂಚೆಪೆಟ್ಟಿಗೆ ವಿನ್ಯಾಸದ ಕೀಚೈನ್‌ಗಳು ಸೇರಿದಂತೆ ವಿವಿಧ ಫಿಲಾಟಲಿ ಸ್ಮರಣಿಕೆಗಳು ಸಾರ್ವಜನಿಕರ ಖರೀದಿಗೆ ಲಭ್ಯವಿರಲಿವೆ ಎಂದು ಸ್ವಾತಿ ಪಾಂಡೆ ಹೇಳಿದರು.

ಪಾಸ್‌ಪೋರ್ಟ್‌ನಲ್ಲಿ ಗುರುತಿಸಿರುವ ಕರ್ನಾಟಕದ ಎಲ್ಲ ಪಾರಂಪರಿಕ ಅಂಚೆ ಕಚೇರಿಗಳಿಗೆ ಭೇಟಿ ನೀಡಿ, ನಿಗದಿತ ಅಂಚೆ ಮೊಹರುಗಳನ್ನು ಸಂಗ್ರಹಿಸಿ ಪಾಸ್‌ಪೋರ್ಟ್ ಪೂರ್ಣಗೊಳಿಸಿದ ಸಂಗ್ರಾಹಕರನ್ನು ವಿಶೇಷ ಉಡುಗೊರೆ ಕಿಟ್ ನೀಡಿ ಸನ್ಮಾನಿಸಲಾಗುವುದು ಎಂದರು.

ಮೊದಲು ಬಂದವರಿಗೆ ಮೊದಲ ಆದ್ಯತೆ

ಫಿಲಾಟಲಿ ಪಾಸ್‌ಪೋರ್ಟ್‌ಗಳ ಮಾರಾಟವನ್ನು ಮೊದಲು ಬಂದವರಿಗೆ ಮೊದಲ ಆದ್ಯತೆ ಆಧಾರದ ಮೇಲೆ ನಡೆಸಲಾಗುತ್ತದೆ. ಕೌಂಟರ್‌ಗಳಲ್ಲಿ ನೀಡಲಾಗುವ ಟೋಕನ್ ಮೂಲಕ ನೇರ ಮಾರಾಟ ನಡೆಯಲಿದ್ದು, ಈ ಹಂತದಲ್ಲಿ ಆನ್‌ಲೈನ್ ಮಾರಾಟ ಅಥವಾ ಮುಂಗಡ ಕಾಯ್ದಿರಿಸುವ ಸೌಲಭ್ಯ ಇರುವುದಿಲ್ಲ ಎಂದು ಅವರು ಸ್ಪಷ್ಟಪಡಿಸಿದರು.

ಬೆಂಗಳೂರು ಜಿಪಿಒದಲ್ಲಿ ಹೆಚ್ಚಿನ ಜನಸಂದಣಿ ನಿರೀಕ್ಷಿಸಿರುವ ಹಿನ್ನೆಲೆಯಲ್ಲಿ ವ್ಯವಸ್ಥಿತ ಬ್ಯಾರಿಕೇಡ್ ಸರತಿ ಸಾಲುಗಳನ್ನು ನಿರ್ಮಿಸಲಾಗುತ್ತಿದ್ದು, ನಿರ್ದಿಷ್ಟ ಅಂತರದಲ್ಲಿ ಸ್ವಯಂಸೇವಕರನ್ನು ನಿಯೋಜಿಸಲಾಗುತ್ತದೆ. ಕಾಯುವ ಸಮಯ ಕಡಿಮೆ ಮಾಡಲು ಹೆಚ್ಚುವರಿ ಪಾವತಿ ಕೌಂಟರ್‌ಗಳನ್ನೂ ತೆರೆಯಲಾಗುತ್ತದೆ ಎಂದು ತಿಳಿಸಿದರು.

ಅಕ್ಟೋಬರ್ 10 ಮತ್ತು 11ರಂದು ಬೆಂಗಳೂರು ಜಿಪಿಒ ಆವರಣದಲ್ಲಿ ವಾಹನ ನಿಲುಗಡೆ ಸೌಲಭ್ಯ ಇರುವುದಿಲ್ಲ. ಆದ್ದರಿಂದ ಸಾರ್ವಜನಿಕರು ಸಾಧ್ಯವಾದಷ್ಟು ಸಾರ್ವಜನಿಕ ಸಾರಿಗೆಯನ್ನು ಬಳಸಬೇಕು. ನಮ್ಮ ಮೆಟ್ರೋದ ಡಾ. ಬಿ.ಆರ್. ಅಂಬೇಡ್ಕರ್ ನಿಲ್ದಾಣ ಅಥವಾ ಕಬ್ಬನ್ ಪಾರ್ಕ್ ನಿಲ್ದಾಣ ಮೂಲಕ ಜಿಪಿಒ ತಲುಪಬಹುದು ಎಂದು ಸಲಹೆ ನೀಡಿದರು.

ಗ್ರಾಮೀಣ ಅಂಚೆ ಕಚೇರಿಗಳಿಗೂ ಡಿಜಿಟಲ್ ಸ್ಪರ್ಶ

ಕರ್ನಾಟಕದಲ್ಲಿ 9,000ಕ್ಕೂ ಹೆಚ್ಚು ಅಂಚೆ ಕಚೇರಿಗಳ ಜಾಲವಿದ್ದು, ಗ್ರಾಮೀಣ ಪ್ರದೇಶಗಳಲ್ಲಿಯೂ ಬ್ಯಾಂಕಿಂಗ್, ಹಣಕಾಸು ಒಳಗೊಳ್ಳುವಿಕೆ ಹಾಗೂ ಹಲವು ನಾಗರಿಕ ಸೇವೆಗಳನ್ನು ಅಂಚೆ ಇಲಾಖೆ ಒದಗಿಸುತ್ತಿದೆ. ಗ್ರಾಮೀಣ ಅಂಚೆ ಕಚೇರಿಗಳನ್ನು ಹಂತ ಹಂತವಾಗಿ ಕಾಗದರಹಿತ ಮತ್ತು ಸಂಪೂರ್ಣ ಡಿಜಿಟಲ್ ವ್ಯವಸ್ಥೆಗೆ ಪರಿವರ್ತಿಸುವ ನಿಟ್ಟಿನಲ್ಲಿ ಇಲಾಖೆ ಕಾರ್ಯನಿರ್ವಹಿಸುತ್ತಿದೆ ಎಂದು ಸ್ವಾತಿ ಪಾಂಡೆ ಹೇಳಿದರು.

ವಿಶ್ವ ಅಂಚೆ ದಿನ ಮತ್ತು ಅಂಚೆ ಸಪ್ತಾಹದ ಅಂಗವಾಗಿ ಹಣಕಾಸು ಒಳಗೊಳ್ಳುವಿಕೆ, ಗ್ರಾಹಕ ಕೇಂದ್ರೀಕೃತ ಸೇವೆಗಳು, ಮೇಲ್ ಮತ್ತು ಪಾರ್ಸೆಲ್ ಸೇವೆಗಳು, ತಂತ್ರಜ್ಞಾನ ಮತ್ತು ನವೋತ್ಪಾದನೆ ಸೇರಿದಂತೆ ವಿವಿಧ ಕಾರ್ಯಕ್ರಮಗಳನ್ನು ಆಯೋಜಿಸಲಾಗಿದೆ. ಪತ್ರಗಳನ್ನು ತಲುಪಿಸುವ ಸಾಂಪ್ರದಾಯಿಕ ಸೇವೆಯ ಜೊತೆಗೆ ಪಾರ್ಸೆಲ್, ಲಾಜಿಸ್ಟಿಕ್ಸ್, ಬ್ಯಾಂಕಿಂಗ್, ಆಧಾರ್ ಹಾಗೂ ಪಾಸ್‌ಪೋರ್ಟ್ ಸೇವೆಗಳ ಮೂಲಕ ಭಾರತ ಅಂಚೆ ಜನರ ದೈನಂದಿನ ಬದುಕಿನ ಅವಿಭಾಜ್ಯ ಅಂಗವಾಗಿ ಬೆಳೆಯುತ್ತಿದೆ ಎಂದು ಅವರು ಹೇಳಿದರು.

ಪತ್ರಿಕಾಗೋಷ್ಠಿಯಲ್ಲಿ ಅಂಚೆ ಇಲಾಖೆಯ ಅಧಿಕಾರಿಗಳಾದ ಸಂದೇಶ್ ಮಹದೇವಪ್ಪ, ಅಖಿಲ್ ಆರ್. ನಾಯರ್ ಹಾಗೂ ತಾರಾ ಉಪಸ್ಥಿತರಿದ್ದರು.