ಬೆಂಗಳೂರು: ರಾಜ್ಯದಾದ್ಯಂತ ಸಣ್ಣ ನೀರಾವರಿ ಇಲಾಖೆಯ ಕೆರೆಗಳಲ್ಲಿ ಈ ಬೇಸಿಗೆಯಲ್ಲೂ ಸಮರ್ಪಕ ನೀರಿನ ಸಂಗ್ರಹವಿರುವುದು ರೈತರಿಗೆ ದೊಡ್ಡ ಮಟ್ಟದ ಆಶಾಭರವೆಯನ್ನು ಮೂಡಿಸಿದೆ. ಇಲಾಖೆಯ ವ್ಯಾಪ್ತಿಯಲ್ಲಿರುವ ಒಟ್ಟು 3,788 ಕೆರೆಗಳ ಮೂಲಕ ಸುಮಾರು 4,45,009 ಹೆಕ್ಟೇರ್ಗಳ ಅಚ್ಚುಕಟ್ಟು ಪ್ರದೇಶಕ್ಕೆ (ಕಮಾಂಡ್ ಏರಿಯಾ) ಜೀವಜಲ ಲಭ್ಯವಾಗುತ್ತಿದೆ ಎಂದು ಸಣ್ಣ ನೀರಾವರಿ, ವಿಜ್ಞಾನ ಮತ್ತು ತಂತ್ರಜ್ಞಾನ ಸಚಿವ ಎನ್ ಎಸ್ ಭೋಸರಾಜು ತಿಳಿಸಿದ್ದಾರೆ.
ಕೆರೆಗಳಲ್ಲಿ ನೀರಿನ ಮಟ್ಟ ಸ್ಥಿರ
ಇತ್ತೀಚಿನ ದತ್ತಾಂಶಗಳ ಪ್ರಕಾರ, ರಾಜ್ಯದ ಬಹುಪಾಲು ಕೆರೆಗಳು ಉತ್ತಮ ನೀರಿನ ಮಟ್ಟವನ್ನು ಕಾಯ್ದುಕೊಂಡಿವೆ. ಬೇಸಿಗೆಯ ನಡುವೆಯೂ 165 ಕೆರೆಗಳು ಸಂಪೂರ್ಣ ಭರ್ತಿಯಾಗಿದ್ದು, 1,355 ಕೆರೆಗಳು ಶೇ. 51 ಕ್ಕಿಂತ ಹೆಚ್ಚು ನೀರಿನ ಸಂಗ್ರಹ ಹೊಂದಿವೆ. ಇದೇ ವೇಳೆ 1,143 ಕೆರೆಗಳು ಶೇ. 50ರ ಮಟ್ಟದಲ್ಲಿ ನೀರನ್ನು ಉಳಿಸಿಕೊಂಡಿದ್ದು, 959 ಕೆರೆಗಳಲ್ಲಿ ಶೇ. 30ರಷ್ಟು ಸಂಗ್ರಹ ದಾಖಲಾಗಿದೆ.
ಜಿಲ್ಲಾವಾರು ಸಾಧನೆ
ಜಿಲ್ಲೆಗಳ ಮಟ್ಟದಲ್ಲಿ ನೋಡಿದರೆ, ದಾವಣಗೆರೆ ಜಿಲ್ಲೆ ಅತ್ಯುತ್ತಮ ಸಾಧನೆ ತೋರಿದ್ದು, ಬೇಸಿಗೆಯಲ್ಲೂ 27 ಕೆರೆಗಳು ಭರ್ತಿಯಾಗಿವೆ. ಚಿಕ್ಕಮಗಳೂರು ಜಿಲ್ಲೆಯಲ್ಲಿ 46 ಕೆರೆಗಳು ತುಂಬಿ ನಿಂತಿದ್ದು ಗಮನಾರ್ಹ ಸಾಧನೆ ಆಗಿದೆ. ಹಾಸನ, ತುಮಕೂರು ಮತ್ತು ಕೋಲಾರ ಜಿಲ್ಲೆಗಳೂ ಉತ್ತಮ ನೀರಿನ ಸಂಗ್ರಹವನ್ನು ಕಾಯ್ದುಕೊಂಡಿವೆ.
ಯೋಜನೆಗಳ ಪರಿಣಾಮ
ಸಣ್ಣ ನೀರಾವರಿ ಇಲಾಖೆಯ ಅಡಿಯಲ್ಲಿ 145 ಕೆರೆ ತುಂಬಿಸುವ ಏತ ನೀರಾವರಿ ಯೋಜನೆಗಳ ಮೂಲಕ 1,073 ಕೆರೆಗಳಿಗೆ ನೀರು ತುಂಬಲಾಗುತ್ತಿದೆ. ಉತ್ತಮ ಮುಂಗಾರು ಮಳೆ ಹಾಗೂ ಸರ್ಕಾರದ ಸಮರ್ಪಕ ಜಲ ನಿರ್ವಹಣಾ ಕಾರ್ಯತಂತ್ರಗಳು ಈ ಸಾಧನೆಗೆ ಕಾರಣವಾಗಿವೆ ಎಂದು ಸಚಿವರು ತಿಳಿಸಿದ್ದಾರೆ.
ಸಚಿವರ ಅಭಿಪ್ರಾಯ
“ಮಾರ್ಚ್ ಅಂತ್ಯದ ವೇಳೆಗೆ ಕೆರೆಗಳಲ್ಲಿ ಇಷ್ಟೊಂದು ಪ್ರಮಾಣದ ನೀರು ಉಳಿದಿರುವುದು ಅತ್ಯಂತ ಪ್ರೋತ್ಸಾಹದಾಯಕ. 1,355 ಕೆರೆಗಳು ಬಹುಪಾಲು ತುಂಬಿರುವುದು ಹಾಗೂ 165 ಕೆರೆಗಳು ಸಂಪೂರ್ಣ ಭರ್ತಿಯಾಗಿರುವುದು ಕೆರೆ ಪುನರುಜ್ಜೀವನ ಮತ್ತು ನೀರಾವರಿ ಯೋಜನೆಗಳ ಯಶಸ್ಸಿನ ಸೂಚಕವಾಗಿದೆ,” ಎಂದು ಭೋಸರಾಜು ಹೇಳಿದ್ದಾರೆ.
ಇನ್ನು ಏತ ನೀರಾವರಿ ಯೋಜನೆಗಳ ಮೂಲಕ ಶುದ್ಧ ನೀರಿನ ನಿರಂತರ ಹರಿವು ಖಚಿತಪಡಿಸುವ ಕ್ರಮಗಳನ್ನು ಕೈಗೊಳ್ಳಲಾಗಿದ್ದು, ವಿಶೇಷವಾಗಿ ಬಯಲುಸೀಮೆ ಜಿಲ್ಲೆಗಳಲ್ಲಿ ಕೆರೆಗಳು ಬತ್ತದಂತೆ ನೋಡಿಕೊಳ್ಳಲಾಗಿದೆ. “ಜಲ-ಸುರಕ್ಷಿತ ಕರ್ನಾಟಕ ನಿರ್ಮಾಣದ ನಮ್ಮ ಪ್ರಯತ್ನಗಳು ತಳಮಟ್ಟದಲ್ಲಿ ಪರಿಣಾಮಕಾರಿಯಾಗಿ ಕೆಲಸ ಮಾಡುತ್ತಿರುವುದಕ್ಕೆ ಈ ಅಂಕಿ-ಅಂಶಗಳೇ ಸಾಕ್ಷಿ,” ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದರು.
ರೈತರಿಗೆ ನೇರ ಲಾಭ
ಕೆರೆಗಳಲ್ಲಿ ಉಳಿದಿರುವ ನೀರಿನ ಸಂಗ್ರಹವು ರಾಜ್ಯದ 4.45 ಲಕ್ಷ ಹೆಕ್ಟೇರ್ ಅಚ್ಚುಕಟ್ಟು ಪ್ರದೇಶದ ಲಕ್ಷಾಂತರ ರೈತರಿಗೆ ನೇರ ಪ್ರಯೋಜನ ಒದಗಿಸುವ ನಿರೀಕ್ಷೆಯಿದೆ.
