ಕೆಸ್ವಾನ್ ಟೆಂಡರ್‌ನಲ್ಲಿ ಅಕ್ರಮ – ₹94.44 ಕೋಟಿ ಹೆಚ್ಚುವರಿ ಹೊರೆ: ಕೆಆರ್‌ಎಸ್ ಆರೋಪ

ಕರ್ನಾಟಕ ಸರ್ಕಾರದ ಇ-ಆಡಳಿತ ಇಲಾಖೆಯು ಟೆಂಡರ್ ನಿಯಮಾವಳಿಗಳನ್ನು ಉಲ್ಲಂಘಿಸಿ KSWAN 3.0 (Karnataka State Wide Area Network) ಯೋಜನೆಯ ಟೆಂಡರ್ ಪ್ರಕ್ರಿಯೆಯನ್ನು ನಡೆಸಿರುವುದು ಗಂಭೀರ ಅನುಮಾನಗಳಿಗೆ ಕಾರಣವಾಗಿದೆ. ಈ ಪ್ರಕ್ರಿಯೆಯಿಂದ ಸರ್ಕಾರಕ್ಕೆ ಸುಮಾರು ₹94.44 ಕೋಟಿ ಹೆಚ್ಚುವರಿ ಹೊರೆ ಬಿದ್ದಿರುವುದು ಗಮನಾರ್ಹವಾಗಿದೆ ಎಂದು ಕರ್ನಾಟಕ ರಾಷ್ಟ್ರ ಸಮಿತಿ (ಕೆಆರ್‌ಎಸ್) ಪಕ್ಷ ಆರೋಪಿಸಿದೆ.

ರಾಜ್ಯದ ಎಲ್ಲಾ ಸರ್ಕಾರಿ ಕಚೇರಿಗಳನ್ನು ಅಂತರ್ಜಾಲದ ಮೂಲಕ ಸಂಪರ್ಕಿಸಲು ಈಗಾಗಲೇ ವ್ಯವಸ್ಥೆ ಇದ್ದು, ಅದನ್ನು ಉನ್ನತೀಕರಿಸುವ ಉದ್ದೇಶದಿಂದ KSWAN 3.0 ಯೋಜನೆ ರೂಪಿಸಲಾಯಿತು. 2022ರಿಂದ ಈ ಯೋಜನೆಗೆ ಪೂರ್ವ ತಯಾರಿ ನಡೆಯುತ್ತಿದ್ದು, ಟೆಂಡರ್ ದಾಖಲೆಗಳ ತಯಾರಿಗಾಗಿ ಪ್ರೈಸ್‌ವಾಟರ್‌ಹೌಸ್ ಕೂಪರ್ (PWC) ಕಂಪನಿಯನ್ನು ಸಲಹೆಗಾರರಾಗಿ ನೇಮಿಸಲಾಗಿತ್ತು.

ಮೊದಲ ಟೆಂಡರ್ ರದ್ದು – ಅನುಮಾನಕ್ಕೆ ಕಾರಣ
2025 ಜುಲೈ 11ರಂದು ಟೆಂಡರ್ ಸಂಖ್ಯೆ CEG/2025-26/IND0043 ಮೂಲಕ ಟೆಂಡರ್ ಆಹ್ವಾನಿಸಲಾಯಿತು. ರೈಲ್‌ಟೆಲ್ ಕಾರ್ಪೊರೇಷನ್, ಆರೆಂಜ್ ಬ್ಯುಸಿನೆಸ್ ಮತ್ತು ಟೆಲಿಕಮ್ಯುನಿಕೇಶನ್ ಕನ್ಸಲ್ಟಂಟ್ಸ್ ಇಂಡಿಯಾ ಲಿಮಿಟೆಡ್ (TCIL) ಸೇರಿದಂತೆ ಪ್ರಮುಖ ಕಂಪನಿಗಳು ಭಾಗವಹಿಸಿದ್ದವು. ಆದರೆ ಸೂಕ್ತ ಕಾರಣ ನೀಡದೆ, ದಾಖಲೆಗಳ ಕೊರತೆಯ ನೆಪದಲ್ಲಿ ಟೆಂಡರ್ ರದ್ದುಗೊಳಿಸಲಾಯಿತು. ಸಾಮಾನ್ಯವಾಗಿ ದಾಖಲೆಗಳ ತಿದ್ದುಪಡಿ ಅವಕಾಶ ನೀಡಲಾಗುವ ಸಂದರ್ಭದಲ್ಲಿ, ಈ ಕ್ರಮ ಅನುಮಾನಾಸ್ಪದವಾಗಿದೆ.

ನಿಯಮ ಉಲ್ಲಂಘಿಸಿ Call-2 ಟೆಂಡರ್
ನಂತರ ತಾಂತ್ರಿಕ ಮಾನದಂಡಗಳಲ್ಲಿ ಬದಲಾವಣೆ ಮಾಡಿ, 2025 ಡಿಸೆಂಬರ್ 8ರಂದು Call-2 ಮೂಲಕ ಮತ್ತೆ ಟೆಂಡರ್ ಕರೆಯಲಾಗಿದೆ. KTTP ಕಾಯ್ದೆಯ ಪ್ರಕಾರ, ಮಾನದಂಡಗಳಲ್ಲಿ ಬದಲಾವಣೆ ಮಾಡಿದರೆ ಹೊಸ ಟೆಂಡರ್ ಕರೆಯಬೇಕು. ಆದರೆ ಇಲ್ಲಿ ಹಳೆಯ ಟೆಂಡರ್‌ನ್ನು ಮರು ಆಹ್ವಾನಿಸಿರುವುದು ನಿಯಮ ಉಲ್ಲಂಘನೆಯಾಗಿದೆ ಎಂದು ಕೆಆರ್‌ಎಸ್ ಆರೋಪಿಸಿದೆ.

ಈ ಹಂತದಲ್ಲಿ ಮಾನದಂಡಗಳನ್ನು ನಿರ್ದಿಷ್ಟ ಕಂಪನಿಗೆ ಅನುಕೂಲವಾಗುವಂತೆ ಬದಲಾಯಿಸಲಾಗಿದೆ ಎನ್ನುವ ಅನುಮಾನ ವ್ಯಕ್ತವಾಗಿದೆ. ಇದರಿಂದ Call-2ನಲ್ಲಿ ಕೇವಲ ರೈಲ್‌ಟೆಲ್ ಮತ್ತು TCIL ಮಾತ್ರ ಭಾಗವಹಿಸಿದ್ದವು.

₹350 ಕೋಟಿಯಿಂದ ₹444.44 ಕೋಟಿಗೆ ಏರಿಕೆ
ಮೊದಲ ಟೆಂಡರ್‌ನಲ್ಲಿ ಯೋಜನೆಯ ಅಂದಾಜು ವೆಚ್ಚ ₹350 ಕೋಟಿ ಇದ್ದರೆ, ಎರಡನೇ ಟೆಂಡರ್‌ನಲ್ಲಿ ಅದು ₹444.44 ಕೋಟಿಗೆ ಏರಿಕೆಯಾಗಿದೆ. ಇದರಿಂದ ₹94.44 ಕೋಟಿ ಹೆಚ್ಚುವರಿ ಹೊರೆ ಉಂಟಾಗಿದೆ.

ಸರ್ಕಾರಕ್ಕೆ ಪತ್ರ – ಕ್ರಮವಿಲ್ಲ
ಈ ಅಕ್ರಮಗಳ ಬಗ್ಗೆ ಕೆಆರ್‌ಎಸ್ ಪಕ್ಷವು 25-03-2026ರಂದು ಇ-ಆಡಳಿತ ಇಲಾಖೆಗೆ ಪತ್ರ ಬರೆದು ಟೆಂಡರ್ ರದ್ದುಪಡಿಸಲು ಮತ್ತು ಸ್ಪಷ್ಟನೆ ನೀಡಲು ಆಗ್ರಹಿಸಿತು. ಆದರೆ ಯಾವುದೇ ಕ್ರಮ ಕೈಗೊಳ್ಳದೇ, 27-03-2026ರಂದು ರೈಲ್‌ಟೆಲ್ ಕಂಪನಿಗೆ Letter of Intent ನೀಡಲಾಗಿದೆ.

ತಾಂತ್ರಿಕ ದೋಷಗಳ ಬಗ್ಗೆ ಆಕ್ಷೇಪ
ತಾಂತ್ರಿಕ ಮಾನದಂಡಗಳಲ್ಲಿ ಮೂಲ ರೌಟರ್ ಸಾಮರ್ಥ್ಯ ಕಡಿಮೆ ಮತ್ತು ಅಂತಿಮ ರೌಟರ್ ಸಾಮರ್ಥ್ಯ ಹೆಚ್ಚುವಂತೆ ವಿನ್ಯಾಸ ಮಾಡಿರುವುದು, ಸರ್ವರ್ ಸಮಸ್ಯೆಯನ್ನು ಹೆಚ್ಚಿಸುವ ಸಾಧ್ಯತೆ ಇದೆ ಎಂದು ಪಕ್ಷ ಅಭಿಪ್ರಾಯಪಟ್ಟಿದೆ.

ಮುಖ್ಯಮಂತ್ರಿಗೆ ಪ್ರಶ್ನೆಗಳು
ಈ ಯೋಜನೆಯಲ್ಲಿ ಕಂಡುಬರುವ ಲೋಪಗಳಿಗೆ ಯಾರು ಹೊಣೆ? ಸಲಹೆಗಾರ ಕಂಪನಿಯ ಪಾತ್ರವೇನು? ಅವರಿಗೆ ದಂಡ ವಿಧಿಸಲಾಯಿತೇ?
ಮುಖ್ಯಮಂತ್ರಿಗಳ ನೇರ ಉಸ್ತುವಾರಿಯಲ್ಲಿರುವ ಇಲಾಖೆಯಲ್ಲಿ ಇಂತಹ ಅಕ್ರಮಗಳು ನಡೆದಿರುವುದಕ್ಕೆ ಮುಖ್ಯಮಂತ್ರಿ ಉತ್ತರಿಸಬೇಕಾಗಿದೆ ಎಂದು ಕೆಆರ್‌ಎಸ್ ಒತ್ತಾಯಿಸಿದೆ.

ಒಂದು ನಿರ್ದಿಷ್ಟ ಕಂಪನಿಗೆ ಅನುಕೂಲ ಮಾಡಿಕೊಡಲು ಟೆಂಡರ್ ತಿರುಚಲಾಗಿದೆ ಎಂಬ ಆರೋಪ ಕೇಳಿಬರುತ್ತಿದ್ದು, ಇದರ ಸತ್ಯಾಸತ್ಯತೆ ಬಗ್ಗೆ ಸರ್ಕಾರ ಸ್ಪಷ್ಟನೆ ನೀಡಬೇಕು ಎಂದು ಪಕ್ಷ ಆಗ್ರಹಿಸಿದೆ.

ತಕ್ಷಣ ಟೆಂಡರ್ ರದ್ದುಪಡಿಸಲು ಒತ್ತಾಯ
ಒಂದೇ ಕಂಪನಿಗೆ ಅನುಕೂಲವಾಗುವಂತೆ ಮಾನದಂಡಗಳನ್ನು ರೂಪಿಸಿ ಏಕಸ್ವಾಮ್ಯಕ್ಕೆ ಅವಕಾಶ ಮಾಡಿಕೊಟ್ಟಿರುವುದು ಭವಿಷ್ಯದಲ್ಲಿ ಸರ್ಕಾರಕ್ಕೆ ಹೆಚ್ಚಿನ ಆರ್ಥಿಕ ಹೊರೆ ತರಬಹುದು. ಆದ್ದರಿಂದ ತಕ್ಷಣವೇ ಈ ಟೆಂಡರ್ ಪ್ರಕ್ರಿಯೆಯನ್ನು ರದ್ದುಪಡಿಸಬೇಕು ಎಂದು ಕೆಆರ್‌ಎಸ್ ಪಕ್ಷ ಆಗ್ರಹಿಸಿದೆ.

ಪತ್ರಿಕಾಗೋಷ್ಠಿಯನ್ನು ಉದ್ದೇಶಿಸಿ ರಾಜ್ಯಾಧ್ಯಕ್ಷರಾದ ದೀಪಕ್ ಸಿ.ಎನ್ ಮಾತನಾಡಿದರು. ಈ ಸಂದರ್ಭದಲ್ಲಿ ರಾಜ್ಯ ಸಂಘಟನಾ ಕಾರ್ಯದರ್ಶಿಗಳಾದ ಆರೋಗ್ಯ ಸ್ವಾಮಿ ಹಾಗೂ ರಘುನಂದನ ಉಪಸ್ಥಿತರಿದ್ದರು.