ಬೆಂಗಳೂರು: ನ್ಯಾ. ನಾಗಮೋಹನ್ ದಾಸ್ ಆಯೋಗದ ವರದಿಯನ್ನು ಸಂಪೂರ್ಣವಾಗಿ ತಿರಸ್ಕರಿಸಬೇಕು ಮತ್ತು 2025ರ ಆಗಸ್ಟ್ 18ರಂದು ನಡೆದ ವಿಶೇಷ ಸಚಿವ ಸಂಪುಟ ಸಭೆಯಲ್ಲಿ ತೆಗೆದುಕೊಳ್ಳಲಾದ ಒಳಮೀಸಲಾತಿ ಸಂಬಂಧಿತ ನಿರ್ಣಯವನ್ನು ಮರುಪರಿಶೀಲಿಸಿ ತಕ್ಷಣ ಕೈಬಿಡಬೇಕು ಎಂದು ಕರ್ನಾಟಕ ರಾಜ್ಯ ಬಲಗೈ ಸಮುದಾಯಗಳ ಒಕ್ಕೂಟದ ಅಧ್ಯಕ್ಷರಾದ ಶ್ರೀ ಶ್ರೀ ಶ್ರೀ ಜ್ಞಾನ ಪ್ರಕಾಶ್ ಸ್ವಾಮೀಜಿ ಹೇಳಿದರು.
ಪ್ರೆಸ್ ಕ್ಲಬ್ನಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ವೈಜ್ಞಾನಿಕ ಮತ್ತು ಸಂಪೂರ್ಣ ದತ್ತಾಂಶದ ಆಧಾರದ ಮೇಲೆ ಹೊಸ ಸಮೀಕ್ಷೆ ನಡೆಸಬೇಕು ಎಂದು ಒತ್ತಾಯಿಸಿದರು. ಈಗಿರುವ ಸ್ಥಿತಿಯಲ್ಲಿ ಹಿಂದಿನ 15% ಪರಿಶಿಷ್ಟ ಜಾತಿ ಮೀಸಲಾತಿಯಲ್ಲಿ ಒಳಮೀಸಲಾತಿ ಕಲ್ಪಿಸುವುದು ನ್ಯಾಯಾಂಗದ ಉಲ್ಲಂಘನೆಯಾಗುತ್ತದೆ ಎಂದು ಸ್ಪಷ್ಟಪಡಿಸಿದರು.
ಅಪೂರ್ಣ ದತ್ತಾಂಶದ ಮೇಲೆ ವರದಿ: ಗಂಭೀರ ಆರೋಪ
ಒಳಮೀಸಲಾತಿ ಕುರಿತಂತೆ ಭಾರತ ಸರ್ವೋಚ್ಚ ನ್ಯಾಯಾಲಯ ನೀಡಿದ ತೀರ್ಪಿನ ಪ್ರಕಾರ, ಉಪವರ್ಗೀಕರಣ ಮಾಡಲು ರಾಜ್ಯಕ್ಕೆ ಅಧಿಕಾರ ಇದ್ದರೂ, ಅದರಿಗಾಗಿ ಸಮರ್ಪಕ ದತ್ತಾಂಶ ಕಡ್ಡಾಯ. ಈ ಹಿನ್ನೆಲೆ ಸರ್ಕಾರವು 12/11/2024ರಂದು ನಾಗಮೋಹನ್ ದಾಸ್ ಅವರ ಅಧ್ಯಕ್ಷತೆಯಲ್ಲಿ ಆಯೋಗ ರಚಿಸಿತ್ತು.
ಆದರೆ, ಆಯೋಗ ನಡೆಸಿದ ಸಮೀಕ್ಷೆ ಸಂಪೂರ್ಣವಾಗಿಲ್ಲ ಎಂದು ಸ್ವಾಮೀಜಿ ಆರೋಪಿಸಿದರು. ಬೆಂಗಳೂರು ಸೇರಿದಂತೆ ಹಲವು ಜಿಲ್ಲೆಗಳಲ್ಲಿ ಸಮೀಕ್ಷೆ ಪೂರ್ಣಗೊಳ್ಳದೆ, ಕೇವಲ ಭಾಗಶಃ ಮಾಹಿತಿ ಆಧರಿಸಿ ವರದಿ ಸಲ್ಲಿಸಲಾಗಿದೆ ಎಂದು ಹೇಳಿದರು.
ಸಮೀಕ್ಷೆಯಲ್ಲಿ ಕಂಡುಬಂದ ಪ್ರಮುಖ ಸಮಸ್ಯೆಗಳು:
- ಬೆಂಗಳೂರು ನಗರದಲ್ಲಿ ಕೇವಲ 48% ಮತ್ತು ಇತರೆ ಜಿಲ್ಲೆಗಳಲ್ಲಿ 52% ಸಮೀಕ್ಷೆ ಮಾತ್ರ ನಡೆದಿದೆ
- ಪಡಿತರ ಚೀಟಿಯಲ್ಲಿ ಹೆಸರು ಇಲ್ಲದ ಸುಮಾರು 8 ಲಕ್ಷ ಮಕ್ಕಳು ಸಮೀಕ್ಷೆಯಿಂದ ಹೊರಗುಳಿದಿದ್ದಾರೆ
- ಗ್ರಾಮ ಮತ್ತು ನಗರ ಪ್ರದೇಶಗಳಲ್ಲಿ ನೋಂದಣಿ ಕೇಂದ್ರಗಳ ಕೊರತೆ
- ಮನೆಮನೆಗೆ ಭೇಟಿ ನೀಡದೇ ಕೇವಲ ನೋಟಿಸ್ ಅಂಟಿಸಿ ಸಮೀಕ್ಷೆ ಪೂರ್ಣವಾಗಿದೆ ಎಂದು ದಾಖಲು
- ತಾಂತ್ರಿಕ ಅಡಚಣೆಗಳಿಂದ ಹಲವರಿಗೆ ಸ್ವಯಂ ದೃಢೀಕರಣ ಅವಕಾಶ ಸಿಗದಿರುವುದು
ಈ ಕಾರಣಗಳಿಂದ ಈ ಸಮೀಕ್ಷೆ ಅವೈಜ್ಞಾನಿಕವಾಗಿದ್ದು, ಅದರ ಆಧಾರದ ಮೇಲೆ ಒಳಮೀಸಲಾತಿ ನೀಡುವುದು ನ್ಯಾಯಾಲಯದ ತೀರ್ಪಿಗೆ ವಿರುದ್ಧ ಎಂದು ಹೇಳಿದರು.
ಸರ್ಕಾರದ ಸೂಚನೆಗಳ ಉಲ್ಲಂಘನೆ
ಆಯೋಗಕ್ಕೆ ನೀಡಿದ್ದ ಮಾರ್ಗಸೂಚಿಗಳನ್ನು ಪಾಲಿಸಲಾಗಿಲ್ಲ ಎಂಬುದು ಮತ್ತೊಂದು ಆರೋಪ. ಸಮಾನ ಸ್ವಭಾವದ ಜಾತಿಗಳನ್ನು ಗುಂಪು ಮಾಡಲು ಸೂಚನೆ ಇದ್ದರೂ, ಬಲಗೈ ಸಮುದಾಯದ 16 ಜಾತಿಗಳನ್ನು ಅಲೆಮಾರಿ ಗುಂಪಿಗೆ ಸೇರಿಸಲಾಗಿದೆ. ಇನ್ನೂ ಕೆಲವು ಜಾತಿಗಳನ್ನು ತಪ್ಪಾಗಿ ಬೇರೆ ಗುಂಪುಗಳಿಗೆ ಸೇರಿಸಲಾಗಿದೆ.
ಇದಲ್ಲದೆ, ಆದಿ ಕರ್ನಾಟಕ, ಆದಿ ದ್ರಾವಿಡ, ಆದಿ ಆಂಧ್ರ ಸಮುದಾಯಗಳ ಮೂಲ ಜಾತಿಗಳನ್ನು ಗುರುತಿಸದೆ, ಸುಮಾರು 4.74 ಲಕ್ಷ ಜನಸಂಖ್ಯೆಗೆ ಕೇವಲ 1% ಮೀಸಲಾತಿ ಶಿಫಾರಸ್ಸು ಮಾಡಿರುವುದು ಸರ್ಕಾರದ ಷರತ್ತುಗಳಿಗೆ ವಿರುದ್ಧ ಎಂದು ಹೇಳಿದರು.
ಅಧಿಕಾರ ಮೀರಿದ ಶಿಫಾರಸ್ಸುಗಳು
ಆಯೋಗವು ತನ್ನ ಅಧಿಕಾರ ಮೀರಿಸಿ A, B, C, D, E ಎಂಬ ಹೊಸ ಗುಂಪುಗಳನ್ನು ಸೃಷ್ಟಿಸಿ ಮೀಸಲಾತಿ ನಿಗದಿ ಪಡಿಸಿರುವುದು ಸರಿಯಲ್ಲ ಎಂದು ಸ್ವಾಮೀಜಿ ಟೀಕಿಸಿದರು.
ಟಿಪ್ಪಣಿ ಬದಲಾವಣೆ ಬಗ್ಗೆ ಅನುಮಾನ
ಸಮಾಜ ಕಲ್ಯಾಣ ಇಲಾಖೆಯ ಮೂಲ ವರದಿಯಲ್ಲಿ ಬಲಗೈ ಸಮುದಾಯ ಪ್ರವರ್ಗ-ಎಯಲ್ಲಿ ಇದ್ದರೂ, ನಂತರದ ಹಂತದಲ್ಲಿ ಅದನ್ನು ಪ್ರವರ್ಗ-ಬಿಗೆ ಬದಲಾಯಿಸಿರುವುದು ಉದ್ದೇಶಪೂರ್ವಕ ಕ್ರಮ ಎಂದು ಆರೋಪಿಸಿದರು. ಇದರಿಂದ ಸಮುದಾಯಕ್ಕೆ ಅನ್ಯಾಯವಾಗಿದ್ದು, ಈ ನಿರ್ಧಾರವನ್ನು ಹಿಂಪಡೆಯಬೇಕು ಎಂದು ಹೇಳಿದರು.
ಸಚಿವ ಸಂಪುಟ ನಿರ್ಣಯಗಳ ವಿರುದ್ಧ ಆಕ್ಷೇಪ
2025ರ ಆಗಸ್ಟ್ 18ರ ಸಚಿವ ಸಂಪುಟ ಸಭೆಯಲ್ಲಿ ತೆಗೆದುಕೊಂಡ ನಿರ್ಣಯಗಳು ವೈಜ್ಞಾನಿಕ ಆಧಾರವಿಲ್ಲದೆ ಮಾಡಲಾಗಿದೆ ಎಂದು ಅವರು ಆರೋಪಿಸಿದರು.
- ಬಲಗೈ ಸಮುದಾಯದ ಜಾತಿಗಳನ್ನು ಬೇರೆ ಗುಂಪಿಗೆ ಸೇರಿಸಲಾಗಿದೆ
- ಕೆಲವು ಜಾತಿಗಳನ್ನು ತಪ್ಪಾಗಿ ಎಡಗೈ ಗುಂಪಿನಲ್ಲಿ ಉಳಿಸಲಾಗಿದೆ
- ಮೂಲ ದತ್ತಾಂಶವಿಲ್ಲದೆ 50%-50% ಹಂಚಿಕೆ ನಿರ್ಧಾರ
ಇವುಗಳು ಸರ್ವೋಚ್ಚ ನ್ಯಾಯಾಲಯದ ಮಾರ್ಗಸೂಚಿಗಳಿಗೆ ವಿರುದ್ಧ ಎಂದು ಹೇಳಿದರು.
ನ್ಯಾಯಾಲಯದ ಆದೇಶ: ಒಳಮೀಸಲಾತಿಗೆ ಅಡ್ಡಿ
ಕರ್ನಾಟಕ ಉಚ್ಚ ನ್ಯಾಯಾಲಯ ಮಧ್ಯಂತರ ಆದೇಶದಲ್ಲಿ, ಒಳಮೀಸಲಾತಿ ಆಧಾರದ ಮೇಲೆ ನೇಮಕಾತಿ ಮಾಡಬಾರದು ಎಂದು ಸೂಚಿಸಿದೆ. ಹೀಗಾಗಿ, ಈ ದತ್ತಾಂಶವನ್ನು ಆಧರಿಸಿ ಒಳಮೀಸಲಾತಿ ಜಾರಿಗೆ ತರಲು ಸಾಧ್ಯವಿಲ್ಲ ಎಂದು ಸ್ವಾಮೀಜಿ ಹೇಳಿದರು.
